|
|
|
FAQ常見問題 |
|
|
4/12/2002
|
去清水灣高速上斜、𣎴料一輪死廢物車倒頭駚出快線從小路、前車急亭、當時車速70km/h,人車衝倒地,好痛,真死廢物車
請小心廢物車,洗街車,駕駛打醒精神,god gless me
2000 hornet 600cc
|
9/8/2002
|
主編你好：本人抯hornet250已一年多，覺得不夠用想轉玩大cc車，但經濟能力不許可，為有退而求其次選擇400級的Yamaha FZ400和B400sf，本人對後者較有信心，但FZ的外形很吸引，不知小問題多唔多，主編可否給我一些專業意見，感激不盡！
CHI 請不要登出e-mail address
即使係CB400SF都會壞，只要定期保養就冇問題。 俾我地揀，會揀FZ400。原因一，CB400SF實在太多太多。原因二，FZ400有風擋實用。
|
6/8/2002
|
編輯你好, 此次是我第2次來信, 很多謝你之前給我的回複.唔知點解好似好少Honda hornet 250 and Suzuki Bandit 250 的二手車出售(包括車行同私人轉讓), 是否250 的街車比較少? 可否提供一些意見給予參考。
Candy 請勿刊登本人電郵地址
猜想是現是香港保險業對新牌的規限問題，導至車行少入呢類車種。加上Bandit 250/400早已停產，貨源更少。如果你可以出到街車，可能Bandit 400重易搵。
|
31/7/2002
|
編輯你好:本人想出部車, 對 Honda hornet 250 and Suzuki Bandit 250 都感興趣, 請問兩車的優點及缺點是什麼? 二手車價錢大概幾多? 適合女仔駕駛嗎? 那一款較為抵買?
Candy tt 請勿刊登本人電郵地址
兩部都係四衝水冷直四街車，動力數據應該十分接近。操控應該係Bandit 250較好，因為車身和輪胎呎碼較正常。論樣靚，hornet 250就靚仔d。女仔騎上去，應該Bandit 250較有信心，但小問題應該hornet 250較少。二手價唔清楚，因為而家D車價變化好大。
|
5/6/2002
|
編輯先生,本人牌齡甚低,現欲購買一部V盤電單車(因乘過朋友那部Monster後喜歡上V-engine 左一拳右一拳之龍船感覺),心目中已將目標鎖定在Suzuki SV650 或Honda VTR 250; <本人不想飛車(:P),老電只作weekend遊車河及幾個週日晚上探朋友,去打波之代步用途。後者外觀頗像Monster及Raptor,但相信現在已沒有新車在市面出售,加上朋友告訴我若V盤車少於400cc駕駛感覺不甚暢快,未知是否真實? 我已到過貴站之用家報告參考過此機車之資料並知其好評,但相比SV又如何?因本人是街車愛好者,故若拿Suzuki SV650和SV650S相比,SV650比較合眼緣. 可是在參考此V盤機車資料時,本港甚至外地都以SV650S為主,甚少有街版SV650之報告;不知街版有沒有特別缺點? 若將此街車版放出二手市場出讓會否較為困難? <本人想買新車原因是希望長渣,但礙於父母及女朋友可能反對駕駛老電(none of them knew I've got the license); 始終正室重要過妾侍,故有可能當被揭發時被迫忍痛割愛,不得不考慮 出讓問題......唉! 昨日經過泰X公司時見到有全新型仔街車hornet250及600出售,未知應否放入考慮範圍? 但兩部售價都為HK$5x,xxx!! 祝貴網達到每日72,000 click 頁成績!! Very impressive Website!!
kelvinspoon@hotmail.com
如果有機會短期內賣車，咁就唔好買新車，因為會蝕好多。其實SV650比SV650S更靚仔，但係供量貨較SV650S少。有冇睇過鈴木有部二手SV650齊料改裝版？ http://www.sbs-technology.com/04_2bikes/00401_main.htm 另外直四引擎的感覺較順滑，俾唔到你喜愛的V2衝突感覺。喂咪住先，你係咪P牌？未必出到保險架，check真D穩陣。
|
26/4/2002
|
主編你好,本人想找一些FZS600的資料,因想重FZS600和hornet600S作出比較,以性能及實用性作選取,主編先生可否給我一些意見和其他選擇.Thank you very much!
Chi kwokchiw@hutchcity.com
我們沒有騎過FZS600，所以不能比較兩者誰勝誰負。若論兩者在香港的成交量都是偏低，二手承接缺乏，當年一手市場散貨速度也緩慢。雖然有說FZS600的操控和用料較優，但始終還是看價錢吧。
|
25/4/2002
|
本人考了牌二年但現在才打算買車, 我打算買250級別的電單車,綿羊及街車都是我的考慮目標, 我對車的要求是好力為主,請問250容量的街車好力或是綿羊好力?有些人說如果買綿羊最好不要買二手, 因綿羊的引擎不耐用, 這是真的嗎?
Wai cheungmingwai@dataworld.com.hk
二手綿羊的可靠程度視乎產地和年份而定，因為損耗性零件的更換頻密程度比街車為高。質素好的綿羊，在零件供應充足下可以走十年以上。但若要求「好力」，同級中應選街車，例如並列四汽缸的hornet 250。
|
23/4/2002
|
編輯先生你好,我係一個新牌仔, 我想問
Hin fritzhin777@sinaman.com
Q1)250cc和400cco既分別係乜野?係咪如果渣400cc俾少少油就會去得快過250cc?
假設大家屬同一車種，汽缸數目相同，咁400無論係頭中尾的輸出都會win晒。如果引擎的扭力大，波箱比率可以做得「低」一點，速度便可以盡快提升。但情況未至於扭少少油都快過250，如果250落係高手中炳盡暴走，斯文400車主輸梗。
Q2)新牌渣400cc有什麼特別需要注意o既地方?彎向靈敏就代表易渣嗎?
四衝400其實都好溫馴，但新手始終要留意油門開啟角度，保險的做法係右手腕不宜吊高。控掣油門的方法不是「扭」，而是「壓」。彎向太過靈敏可能重難控制，因為敏感度高，新手好易被佢嚇親。容易駕駛的機車，最重要係馬力輸出的區域夠廣闊，動力係線性供應，即係講緊power band同埋油門響應性。
Q3)我依家想買一部二手車, 心水有: CB 400SF, hornet 250, VTZ 250,Xelvis VT250, 請問邊一架最適合新牌仔渣?
你提及的選擇當中最適合新手使用的車係VTZ250和Xelvis VT250，因為V盤低扭好和車身較細小。
Q4)我睇中o左架 96'Xelvis VT250($25000)呢部車好似好冷門,如果有問題的話係咪比較難搵零件維修呢?
如果係私讓的話，96' Xelvis VT250賣$25000小貴播。零件應該唔難搵，但如果要整啡呤就可能要土炮修理。
Q5)依家偷車案常見嗎?我現在唔考慮買CB 400 SF o既原因係因為怕俾人偷. 係咪呢一的咁熱門o既車會比較大機會俾人偷?
偷車黑點？冇固定黑點個播，總之有車擺，但又少人到的地方就有危機。如果可以俾貨van埋身就衰多兩錢。防範偷車的基本守則係要一定鎖車，落布cum。可以的話用靚鎖扣實頭尾轆再攬柱，唔好擺同一個位俾人認出。但有心做你的話一定做到，係咁多。CB400SF唔算多人偷，不過靚仔的話就多人搞。車身零件都幾多人搵o架。
Q6)香港有什麼地方是偷車黑點嗎? 想防範偷車有乜野需要注意?我睇過勁車誌既一篇文章,佢地請一個已退休既偷車行家示範開鎖,佢開一個鎖大概只需數十秒.....
其實唔應該登爆鎖的圖片，雖然好睇，但對於一些心術不正或正在摸索爆鎖的人具有啟示作用。外國雜誌年中都做唔少爆鎖測試，重計埋所需時間，但只會影成堆被爆開的爛鎖，唔會影開鎖的過程，就係咁解。
|
11/4/2002
|
請問 直四水冷與 sv 650 v2 性能上有乜分別, thx
wilson wilson1@net-yan.com
唔係好明你想問乜？邊款直四水冷同SV650比先？如果拿 hornet 600比，SV650馬力最高馬力只有70ps，hornet600有95ps，扭力則雙方差不多約6.3kg-m。因為馬力和最高轉數在一定範圍內成正比，直四更適合高轉數發揮，所以馬力會勝過V2。但因V2活塞相比直四來得巨型，所以扭力來得較急。震盪感當然V2多過直四。
|
7/4/2002
|
最近睇中了三部250級別的NK車(因我只有錢買250級), 分別是 hornet250,VTR250, Goose350, 三部車的外形我也很喜歡, 請問邊部車馬力最大呢?邊部最快呢? 我很小見到有Goose350賣, 請問它的售價是多少?呢三部車邊架最流行呢? 你最鐘意邊架呢?
Leo Leokootin@hotmail.com
最大馬力係hornet250(40ps/14000rpm)，因為用直四引擎。因為極速講求馬力，所以最快的車猜想也是hornet 250。Goose350比較冷門，代理都冇入貨，售價唔清楚。邊部最流行呀？好難講，家下香港250街車最hit係CB250，因為商用為多。三部中估計都係hornet及VTR較多。
|
4/3/2002
|
就快就夠一年了! 我的 p 牌和我的綿羊生涯在約一個月後便會完滿結束, 真係好開心
現在係諗換車既時候了, 我想買部二手車, 而我的要求如下:
1. 跑車的外形
2. 街車的騎姿
3. 車份唔太舊
4. 價錢在三萬蚊以下
請問有什麼車可以推介呢? Thanks
SIMON simonkwok@ptwky-hk.com
跑車外型又要街車的騎姿？冇個播？就算ZZ-R250或者VFR800Fi呢類高把手的跑車，點都唔及街車咁高。一係街車S款，例如hornet 600S，ZR-7S之類有原庄半截啡呤o既車ok嗎？FZ400、Bandit 600S都幾好。但如果一定要跑車冇得傾，咁就一定冇。俾到盡SV650S掂唔掂？不過你的預算只係得三萬.....暫時唸唔到有乜好o野推介..其實CBR400RR應該符合到你的要求，睇下搵唔搵到件好o野？
|
21/1/2002
|
編輯大人您好!!本人於數週前購入一輛hornet250(97)，渣渣下發覺有少少問題，其疑問如下﹕
一）究竟正確胎壓應是多少？有人說是30/35（磅），但我現在是28/30（磅），如長期行Highway會否令輪胎變形(平)？
二）本人發現收車時把手有輕微向左郁，是否前叉不直？
三）慢速收車時發現前制動碟受力不均，要換碟或制動皮？
四）有何因由導致上述二、三之問題？
「P」牌戰士謝謝編輯大人幫忙！
looking for lookingforbike@hotmail.com
街車胎氣一般是 28-30/30-34，但視乎個別車款及所使用輪胎型號而定。尾擔上應貼有胎壓指示。胎壓不足會令輪胎與地面磨擦力過多，浪費燃油和加速輪胎耗損，條胎會呈方形。其實可以用肉眼觀察尾胎與路面接觸後所留下的痕跡，一般在胎中央的面積不應超過胎闊的三份一。
收車時向左傾，先檢查前胎壓是否過低，再看頭fork有沒有漏油，轉向承軸(波子盤)有否虛位或打柴需要更換，最後才檢查前叉是否不正常。迫力碟和迫力皮有最低厚度的要求，唔肯定的話請去車行檢查。
|
27/11/2001
|
i want to buy a super four version s ,,,what is the opinion about this bike ??i have two year bike lincence ,,,have rgv ,pgm ,hornet before ,,,,i worry super four too heavy .....what is the price about superfour version s ??buy renew bike or hong kong second hand is good ??
thanks a lot .....^.^
lee logo ricky@hotmail.com
Our comment about CB400SF VS is good as an daily all-rounder. Did you check the owners' report, more than 40 owner had made their statment. If you got 2 years riding experience, you should not found any problem when dealing with CB400SF, take it easy pal....
Price around 2xk - 3xk, our opinion is, the current price of CB400SF is a little bit expensive, when comparing to other big NK bikes....renewal bike importing from Japan or HK 2nd one? all depends on price my friend, neither of them has "trouble free guranantee ".
|
20/11/2001
|
我是抯開250街車的，想轉抯600級車種(CBR600F1、SV650…)有難度嗎？本人長期雙騎，時常上Highway ，每天行60km，可否介紹一些更合本人的車種。如牌齡不夠三年但過30歲出第三保難嗎？多謝解答！
Chi creatart@hkstar.com
相信閣下轉騎600車絕對冇問題。如果要長期雙騎上highway，舒適和扭力都很重要。街車或巡航車或重型綿羊都很適合。SV650S，hornet 600S, Bandit600S，SilverWing 600，ZR-7S等有風擋的中量級車種很適合長途高速雙人巡航。跑車不是太適合每天雙人使用。閣下出保險應該不會太難吧，夠一年牌又夠歲數，應該有得做。
|
13/9/2001
|
主編您好：
上次多得主編解答本人水箱及尾迫力油的問題，感激萬分，我已換了尾迫力皮，同
時發覺傳動鏈條鬆弛，修車技師幫我上番緊條鏈，但我發覺上下移動只有約10mm，是否過緊？又聽聞hornet250的軑氣為前28後30，是否正確？又要麻煩主編解答問題了。多謝！
治 creatart@hkstar.com
唔駛咁客氣。如果你由車鏈的中央上下搖動，只得10mm虛位應該是過緊了。最好參考說明書或看看尾擔上有否指示說明，通常虛位有20-30mm，約一吋至吋半。胎氣問題，很視乎體重多少，駕駛方式，是否長期載人或長期行走高速公路而定。建議由頭30尾34psi開始，漸漸調較至你最滿意的磅數。在可接受的胎壓範圍內，低磅數較咬地，高磅數較省油。自已考慮。留意量度胎壓要待車胎凍後再開始，所以自備一個優質胎壓計不可少。
|
6/9/2001
|
網誌主編： 您好，本人是第一次來信，有些問題想請教，本人是新牌仔一名，剛買了hornet250，加水箱水時發覺水罐隔離有一個量杯，有高底位看，但裡面是一些黃色的液體，不是水箱水的顏色，水面還底過底位，請問那個量杯是點用的？多謝指教。Thank you
治 creatart@hkstar.com
你應該係講緊車身中間，座位之下的副水箱和後掣動油壺。呢兩個都係用半透明膠製造。先講加水，應該加落主水箱而唔係加落副水箱。裝著黃色液體的東東係尾迫力油壺，存量低過底線可能係迫力皮損耗得七七八八，導至油位下降都未定。先檢查迫力皮才決定是否需添加迫力油。講番加水箱水，hornet車系的主水箱蓋是外露在車頭油缸外，要加水箱水要等車頭冷卻後先好開蓋。多口問句，做乜無端端要加水呢？係咪見到副水箱好似冇乜水，於是想加番D呢？副水箱作用係當引擎勁熱時宣洩過多的水壓，待引擎冷卻後壓力減少，主水箱便會從副水箱吸回副水箱的水。單看副水箱的水位來判斷冷卻液是否足夠不可靠的。
|
10/7/2001
|
師兄/姊您好,（相信大家都係同門---駕駛學院）小師弟有個大問題要請教,本人考取駕駛執照數年,實質揸咗車（super four）約一年,絕對好車一部不用多講,但因個人技術、潮流、資金和要求的改變,有意升級轉車:budget只有約四萬五左右,多心的我有多個心水選擇及隱憂,望君給予真實而詳盡意見............ 衷心感謝!!!
RVF400...............太熱門,驚日夜提心吊膽（除時轉咗車主自己都未知!!）
hornet600............前輪得16in.油缸巧合地裝得16L（莫非係lucky no.;據聞幾大食？）
年份高dd嘅CBR900或同級SUPERBIKE（小小擔心揸唔慣fairing車就大鑊!!）
1000cc或以上大街車,ZRX,BANDIT,XJR（小許怕車重!!）
全部好車排名不分先後） 心急的小師弟字
Wong Hysan ninjazx7rr@hotmail.com
咦，咁即係話你手車好o左，錢又多o左，聽見都開心。唔好唸400cc跑車o勒，又騎番街車Bandit /ZRX/ XJR 1200會悶播。係時候升級玩大啡呤。二手車四五萬筆直好多選擇，98年之前的CBR900RR任你揀，99 CBR600F4，再平D有97 ThunderCat YZF600，大把你揀！當你嘆慣大跑車後，自然又會心思思轉玩綿羊或重投街車懷抱！你就好啦！
|
5/7/2001
|
老師你好!!學生我正在學電單車!!我有些問題想問,電單車型號前有兩個年份一個係製造年份,一個登記年份,她怎樣影響個車價!?(為何有時92/98同一款電單車會貴過94/96??)電單車安裝了防盜會否影響她!?新牌仔想出跑車款你就提議CBR250rr/ZZR250,如果想出街車有何提議!!??謝謝老師!!^_^
Chan Kenneth dkenneth55@hotmail.com
喂唔好亂叫，係香港老電圈中，「老師」係另有其人，我地係度只係以車友身份咁傾下閒偈o者。
其實我們應只看製造年份。香港登記年份只是一個意義不大的參考數字。雖然年份越新的電單車應該越貴，但亦要視乎上手的保養程度。一臺全新的電單車若保養不善，一兩年光景便可以殘得不能置信。相反，保養妥善的電單車，只要零件充足，十年八載等聞事，狀態仍可以很好。所以價錢可以有點出入。當中還未計車子是否炒過呢！如果是新車但炒過鑊金o既，咁你話價錢又會如何呢？
通常車行輸入的二手車，他們都應該做了翻新工作才會賣，例如拋光金屬部份，補油，洗車等工作，令車看起來新淨一點，除非檢查到車子有嚴重機械故障，否則都不會再浪費時間跟進。
防盜器易裝難拆，也容易對電池構成負面影響，有錢不如買多兩把鎖穩陣。新牌街車選擇十分多，所有四衝程250都是合適的選擇。當然別買古董車啊，始終現代
車的操控性和電器穩定性都優良得多。平平地買部CB250操車，一定冇錯。當然要靚仔買hornet 250/Zeal 250都冇死錯人。如果身材高大一點，四佰都ok。
|
15/6/2001
|
先多謝你上次意見,我賣左部zxr400比p牌大叔o拉 hehe! 這星期我重剛剛買左部易首 hornet 600街車,部車糸你地個私人轉讓入面買嫁,真要再多謝你地ibike.com.hk全體仝人。
Lok lok lok@kolaraltd.com
又俾你搞掂！？咁大叔最後點樣搞番掂份保險o既呢？ 我記得你果架好似係ZRX400，乜原來係ZXR400....
現有一些hornet 600 零件問題想問各位大佬：
1.hornet 600 可裝釘把嗎? 2.我有支舊(NHK)ZXR400用釘把想裝糸hornet 600度唔知得唔得?
hornet 600 當然可以裝釘把！但係 ZXR400的把手轉向角度係窄過街車o既，所以支釘把會較街車用的短，應該唔適合番裝。如果一定要裝，平平地買支NHK頂住先啦。
3.請問邊度有 hornet 600 補品賣,及有關補品資料綱站呢?
hornet600 d補品好易搵，極驅或亞林應該齊料又有書仔睇。網站冇留意播！照計search engine內鍵入hornet 600應該有排你睇？
祝月月換新車(發o左達果隻) Lok lok <lok@kolaraltd.com>
承你貴言！但係可唔可以再貪心d，個個月換新女呀?
系啊64歲p牌玩ZXR400啊....哈幾勁!!
點樣搞掂份保險,我咪學你話,叫大叔自己去問其它保險公司o羅,如果唔糸我都無計為有取消唔賣比你,正當無望時大叔打電話比我話,糸駕駛學院有個導帥可以同大叔搞掂份保險,幾日後重比份保單我睇跟住咪去轉車主名o羅,真系要多謝駕駛學院個導帥,多謝晒!!
祝日日換女(正果隻) Lok 16 June 01
咁咪即係Day Day俾女飛？
|
23/2/2001
|
David兄:
貴網頁對我這種新牌仔真是大有幫助, 因為我們沒有經驗, 而坊間也沒有什麼渠道學習, 所以瀏覽貴網頁所獲良多!
本人剛考到牌, 想買車代步, 但財政有限, 大約只拿到二萬元. 而本人想先熟習一下棍波的車先, 但不知購買那一種類. 故此想請教您應該如何選購. 應該買新車還是舊車好? 250cc級的車子那一種會較好? 在那裡購置較有信心? 每月養車太約要花多少?
本人的問題較多, 希望您不吝賜正, 謝謝!
price a9802055@ln.edu.hk
二萬元「筆直」買唔到250新車，只能考慮舊車。四衝250是最好選擇。
車款方面，街車最實際，巡航車舒適，250跑車坐得辛苦兼得個樣。爬雞輕便好玩，自已唸唸。
個人推薦街車。單缸(GN250/Volty 250)、雙缸(CB250/EL250)或四缸(Zeal 250/hornet 250)引擎都不要緊。
最緊要是操好密密轉波的技術。 以20k價錢所限，只能買到約三年車齡以上的二手車，小問題一定會有，同車行買或向私人買都預o左舊車會有小問題，要整要煩要換，冇得避。
250因排氣量小，引擎被上手車主長時間搾取馬力實屬正常。架車難撻，容易死火，漏油等唔係大問題，最緊要條胎唔好硬化或光頭，掣動操作要正常。命仔緊要。
如唔想煩，買新車慢慢供都ok，選擇重多好多添。不過條數計埋利息會貴20%左右。
|
| |
|
|
|
 |
|
